ବିନା ପରିଚୟରେ ଟିକା ନେଇଛନ୍ତି ୯୧ ଲକ୍ଷ ଭାରତୀୟ

କରୋନା ଟିକା ନିମନ୍ତେ ଆଧାରକାର୍ଡ ଭଳି ପରିଚୟ ପତ୍ରକୁ ଏକ ପ୍ରକାର ବାଧ୍ୟତାମୂଳକ କରାଯାଇଛି। ତେବେ ଆଧାର କାର୍ଡ କିମ୍ବା ଅନ୍ୟ କୌଣସି ବୈଧ ପ୍ରମାଣପତ୍ର ନଥିବା ୯୧ଲକ୍ଷ ନାଗରିକଙ୍କୁ ଏହି ଟିକା ଦିଆଯାଇଥିବା କେନ୍ଦ୍ର ସରକାର କହିଛନ୍ତି। ଗୁରୁବାର ସର୍ବୋଚ୍ଚ ନ୍ୟାୟାଳୟରେ ଜବାବ ରଖି ସରକାର କହିଛନ୍ତି ଯେ ବିନା ପରିଚୟପତ୍ରରେ ୭୭ ଲକ୍ଷ ଲୋକ ପ୍ରଥମ ପାନ ଟିକା ନେଇଥିବାବେଳେ ୧୪.୫୫ ଲକ୍ଷ ସମ୍ପୂର୍ଣ୍ଣ ଦୁଇଟି ପାନ ଟିକା ନେଇଛନ୍ତି। ବିଚାରପତି ଡିୱାଇ ଚନ୍ଦ୍ରଚୂଡ, ସୂର୍ଯ୍ୟ କାନ୍ତ ଓ ବିକ୍ରମ ନାଥଙ୍କୁ ନେଇ ଗଠିତ ସର୍ବୋଚ୍ଚ ଅଦାଲତଙ୍କ ପୀଠ କହିଛନ୍ତି ଯେ କେନ୍ଦ୍ର ସରକାର ଦାଖଲ କରିଥିବା ସତ୍ୟପାଠ ଅନୁଯାୟୀ ୪.୮୨ଲକ୍ଷ ଲୋକ ବିନା ପରିଚୟପତ୍ରରେ ଟିକା ନେଇଛନ୍ତି। ଦେଶରେ କରୋନାର ତୃତୀୟ ଲହର ପାର ହୋଇଥିବା କେନ୍ଦ୍ର ସରକାର କହିଛନ୍ତି। କେନ୍ଦ୍ର ମନ୍ତ୍ରଣାଳୟ କହିଛି ଯେ ଓମିକ୍ରନ ପ୍ରଜାତି ଯୋଗୁଁ ଦେଶରେ ଆରମ୍ଭ ହୋଇଥିବା ତୃତୀୟ ଲହର ଏହାର ଶିଖର ଅତିକ୍ରମ କରିସାରିଲାଣି। ଶିଖର ଛୁଇଁବା ପରେ ସଂକ୍ରମଣ ଏବେ ହ୍ରାସ ପାଇବାରେ ଲାଗିଛି।