ପୁଣି ଭାଇରାଲ ହେଉଛି ଶ୍ରୀମନ୍ଦିର ଆଡ଼ପ ମଣ୍ଡପ ଭିଡିଓ

ଶ୍ରୀମନ୍ଦିରକୁ ଯିବାପୂର୍ବରୁ ଭକ୍ତଙ୍କୁ ଯାଞ୍ଚ କରି ଛାଡ଼ିବା ପାଇଁ ସିଂହଦ୍ବାରରେ ମାଳ ମାଳ ପୁଲିସ। ତଥାପି ବାରମ୍ବାର ଶ୍ରୀମନ୍ଦିର ଭିତର ଭିଡିଓ ଭାଇରାଲ ହେଉଛି। ଏଇଥିରୁ ଅନୁମେୟ ପୁଲିସ କେତେ ସତର୍କ। ଗତ ନଭେମ୍ବର ୨୦୨୨ ମସିହାରେ ଶ୍ରୀମନ୍ଦିର ଗର୍ଭଗୃହରେ ମହାପ୍ରଭୁଙ୍କ ଫଟୋ ଭାଇରାଲ୍‌ ହୋଇଥିଲା। ଏହି ଘଟଣାରେ ଫଟୋ ଭାଇରାଲ୍‌ କରିଥିବା ବ୍ୟକ୍ତିଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯାଇଥିଲା। ତେବେ ଏଥିରୁ ଚେତିଲେ ନାହିଁ।ଶ୍ରୀମନ୍ଦିର ସୁରକ୍ଷାକୁ ଭେଦକରି ରୋହିତ ଜୟଶ୍ବାଲ ନାମକ ଯୁବକ ଶ୍ରୀମନ୍ଦିର ଭିତର ବେଢ଼ାରେ ମୋବାଇଲ୍‌ରେ ଭିଡିଓ କରି ନିଜ ଇନ୍‌ଷ୍ଟାଗ୍ରାମ ସାଇଟ୍‌ରେ ଏହାକୁ ଛାଡ଼ିଛନ୍ତି। ତେବେ, ଅଭିଯୁକ୍ତ ବିରୋଧରେ ପୁଲିସ ସିଂହଦ୍ବାର ଥାନାରେ ମାମଲା ରୁଜୁ କରିଛି। ଏହି ମାମଲାର ଅଭିଯୁକ୍ତକୁ ଆସନ୍ତା ୩ ତାରିଖ ଦିନ ସିଂହଦ୍ବାର ଥାନାରେ ହାଜର ହେବାପାଇଁ ନୋଟିସ କରିଥିବା ପୁଲିସ କହିଛି। 

ସୂଚନାନୁସାରେ, ଭିଡିଓରୁ କିଛି ସାଙ୍ଗଙ୍କ ସହ ରୋହିତ ଶ୍ରୀମନ୍ଦିର ଯାଇଥିବା ଜଣାପଡ଼ୁଛି। ନିଜେ ପତିତପାବନ ବାନାଙ୍କୁ ମୁଣ୍ଡିଆ ମାରିବା ବେଳେ କେହି ସାଙ୍ଗ ଅବା ପରିଚିତ ବ୍ୟକ୍ତି ତାଙ୍କର ଭିଡିଓ ଉତ୍ତୋଳନ କରିଛନ୍ତି। ଏହି ଭିଡିଓ ସୂର୍ଯ୍ୟମନ୍ଦିର ପାଖରୁ କରାଯାଇଥିବା ଅନୁମାନ କରାଯାଉଛି।ମା’ ଲକ୍ଷ୍ମୀଙ୍କ ମନ୍ଦିର ସମ୍ମୁଖରେ ଛିଡ଼ାହୋଇ ସୂର୍ଯ୍ୟମନ୍ଦିର ପାଖରୁ ଭିଡିଓ ଉତ୍ତୋଳନ କରାଯାଇଥିବାର ଫଟୋରୁ ଜଣାପଡ଼ୁଛି।