ଆଜି ପୁରୀରେ ବସିବ ଦେବସଭା, ବିଳମ୍ବିତ ରାତିରେ ସିଂହଦ୍ୱାର ଆଗରେ ଗୋଷାଣୀଙ୍କ ମେଳଣ ପର୍ବ

ଆଜି ପୁରୀରେ ବସିବ ଦେବସଭା । ବିଳମ୍ବିତ ରାତିରେ ହେବେ ଗୋଷାଣୀଙ୍କ ମିଳନ ପର୍ବ । ପ୍ରତିକୂଳ ପାଗ ପାଇଁ ଗତକାଲି ମେଳଣକୁ ସ୍ଥଗିତ ରଖିଥିଲା ପ୍ରଶାସନ । ପବିତ୍ର ଏକାଦଶୀ ତିଥିରେ ଶ୍ରୀକ୍ଷେତ୍ରରେ ପୂଜା ପାଉଥିବା ଗୋଷାଣୀ ମାନଙ୍କର ଶ୍ରୀମନ୍ଦିର ସମ୍ମୁଖରେ ଦେବସଭା ଅନୁଷ୍ଠିତ ହେବାର ପରମ୍ପରା ରହିଛି । ମହାଦୀପ ଉଠିବା ପରେ ହୋଇଥାଏ ମେଳଣ ଉତ୍ସବ । ଶ୍ରୀକ୍ଷେତ୍ରରେ ଦୁର୍ଗାପୂଜା ଶେଷରେ ଭସାଣ ଉତ୍ସବର ରହିଛି ସ୍ୱତନ୍ତ୍ରତା । ସବୁ ଦୁର୍ଗାମେଢ଼ ବା ଗୋଷାଣି ମେଢ଼ ଶ୍ରୀମନ୍ଦିର ସମ୍ମୁଖରେ ସମ୍ମିଳିତ ହୋଇ ଏକାଦଶୀ ମହାଦୀପ ଉଠିଲା ପରେ ବିସର୍ଜନ କରାଯାଇଥାଏ । ତେବେ ଗତକାଲି ବର୍ଷା ଯୋଗୁଁ ମେଳଣ ସ୍ଥଗିତ ରଖାଯାଇଥିଲା । ପ୍ରତିକୂଳ ପାଗ ଓ ବର୍ଷା ଯୋଗୁ ଗତକାଲି ଶ୍ରୀକ୍ଷେତ୍ରରେ ପ୍ରସିଦ୍ଧ ଗୋସାଣି ଯାତ୍ରା ସ୍ଥଗିତ ରହିଥିଲା। ପରମ୍ପରା ଅନୁଯାୟୀ ସିଂହଦ୍ୱାର ନିକଟରେ ସାତ ସାହି ୪୨ ଗଳିରେ ପ୍ରାୟ ୬୦ଟି ମେଢ ଏକାଠି ହେବ। ସିଂହଦ୍ୱାରରେ ପ୍ରତିବର୍ଷ ପରି ଏବର୍ଷ ମଧ୍ୟ ଗୋସାଣି ଯାତ୍ରା ସମସ୍ତ ପ୍ରସ୍ତୁତି ସରିଛି।ବିଭନ୍ନ ପୂଜା ମଣ୍ଡପରେ ପୂଜାପାଇଥିବା ମା’ ବାରବାଟୀ, ଜହ୍ନିଖାଇ, ଶୂନ୍ୟଗୋସାଣି, ବେଲବାଇ, ଗେଲବାଇ , ନାଗା, ସିମ୍ପାଥି, ବୁଢାବୁଢିି, ଦଶମୁଣ୍ଡିଆ ରାବଣ ଆଦି ମା’ଙ୍କ ବିଭିନ୍ନ ରୂପର ଆକର୍ଷଣୀୟ ଗୋସାଣି ମୂର୍ତ୍ତିଙ୍କ ସମାଗମ ହୋଇଥାଏ। ପରେ ବିଳମ୍ବିତ ରାତିରେ ପ୍ରତିମା ଗୁଡିକର ଭସାଣି କରାଯାଏ। 

ସେପଟେ ଆଜି ରାଉରକେଲାରେ ହେବ ଭସାଣ ଶୋଭାଯାତ୍ରା । ଗତକାଲି ଗୁରୁବାର ଥିବାରୁ କୌଣସି ମଣ୍ଡପରେ ଭସାଣି କରାଯାଇନାହିଁ । ତେଣୁ ଆଜି ରାତି ୮ ସୁଦ୍ଧା ସହରର ସବୁ ମୂର୍ତ୍ତି ମେଳଣ ପଡ଼ିଆରେ ଏକାଠି ହେବା ପରେ ଆରମ୍ଭ ହେବ ବିସର୍ଜନ ଶୋଭାଯାତ୍ରା । ଚଳିତବର୍ଷ ସହରର ୧୦୮ଟି ପୂଜା ମଣ୍ଡପରେ ଦୁର୍ଗାପୂଜା ଅନୁଷ୍ଠିତ ହୋଇଥିଲା । ସେକ୍ଟର ୧୩ ମେଳଣ ପଡ଼ିଆରେ ସମସ୍ତ ପୂଜା ମଣ୍ଡପର ମେଢ଼ ଏକାଠି ହେଲା ବିସର୍ଜନ ପର୍ବ ଆରମ୍ଭ କରାଯିବ ।