ଆଫ୍ରିକାରୁ ପୁଣି ୧୦୦ ଚିତା ଆଣିବ ଭାରତ

ଭାରତକୁ ପୁଣି ଆସିବେ ଆଫ୍ରିକା ଚିତା । ଚିତା ପ୍ରକଳ୍ପ ସଫଳ ହୋଇଥିବା ଦୃଷ୍ଟିରୁ ୧୦୦ ଚିତା ପଠାଇବା ଲାଗି ଭାରତ ଓ ସାଉଥ ଆଫ୍ରିକା ମଧ୍ୟରେ ବୁଝାମଣା ହୋଇଛି । ଆସନ୍ତା ମାସରେ ପ୍ରାଥମିକ ପର୍ଯ୍ୟାୟରେ ୧୨ଟି ଚିତା ଅଣାଯିବା ଲାଗି ନିଷ୍ପତ୍ତି ହୋଇଛି । ଗତବର୍ଷ ସେପ୍ଟେମ୍ବରରେ ନାମିବ୍ୟାରୁ ୮ଟି ଚିତା ଅଣାଯାଇଥିଲା । ସେମାନେ ବର୍ତ୍ତମାନ ସମ୍ପୂର୍ଣ୍ଣ ଭଲ ଅବସ୍ଥାରେ ରହିଛନ୍ତି । ନୂଆ ଯୋଜନାରେ ଆସନ୍ତା ୮ରୁ ୧୦ ବର୍ଷ ଯାଏ ପ୍ରତିବର୍ଷ ୧୨ଟି ଲେଖାଁଏ ଚିତା ଅଣାଯିବାକୁ ନିଷ୍ପତ୍ତି ନିଆଯାଇଛି ।

ଏକଦା ଚିତାସମୃଦ୍ଧ ଭାରତରେ ଚିତା ବଂଶର ବିଲୁପ୍ତ ଘଟିଥିଲା । ଏନେଇ ୧୯୫୨ରେ ବିଧିବଦ୍ଧ ଘୋଷଣା ହୋଇଥିଲା । ୟୁନିଭର୍ସିଟି ଅଫ ପ୍ରିଟୋରିଆର ବନ୍ୟଜନ୍ତୁ ବିଶେଷଜ୍ଞ ଆଦ୍ରିଆନ ଟର୍ଡିଫେ କହିଛନ୍ତି- ଭାରତ ଆସିବାକୁ ଥିବା ଚିତାମାନଙ୍କୁ କ୍ୱାରାଣ୍ଟାଇନରେ ରଖାଯାଇଛି । ସେମାନେ ସମ୍ପୂର୍ଣ୍ଣ ଭଲ ଥିବା ସୂଚନା ମିଳିଛି । ଗତବର୍ଷ ଆସିଥିବା ଚିତାମାନଙ୍କୁ ମଧ୍ୟପ୍ରଦେଶରେ କୁନୋ ଜାତୀୟ ପାର୍କରେ ରଖାଯାଇଛି । ସେଠାରେ ଚିତାମାନଙ୍କ ସ୍ୱତନ୍ତ୍ର ଧ୍ୟାନ ଦିଆଯାଇ ରଖାଯାଇଛି ।