ରାଜଧାନୀରେ କାଳୀପୂଜା: ଦଶ ମହାବେଶରେ ଦର୍ଶନ ଦେବେ ମା’

ରାଜଧାନୀର ପୁରୁଣା କାଳୀପୂଜାମାନଙ୍କ ମଧ୍ୟରୁ ସତ୍ୟନଗର ସତ୍ୟକାଳୀ ମନ୍ଦିରର ପୂଜା ଅନ୍ୟତମ। ଦୁର୍ଲଭ ଦଶ ମହାବିଦ୍ୟା ବେଶ ଦର୍ଶନ ପାଇଁ ପ୍ରସିଦ୍ଧ ସତ୍ୟନଗର ସତ୍ୟକାଳୀ ମନ୍ଦିରରେ ମା’ ମହାକାଳୀଙ୍କ ପୂଜା ପାଇଁ ପ୍ରସ୍ତୁତି ଚୂଡ଼ାନ୍ତ ପର୍ଯ୍ୟାୟରେ ପହଞ୍ଚିଛି। ପରମ୍ପରା ଅନୁସାରେ ଏଠାରେ ମା’ଙ୍କ ପୂଜା ୧୦ ଧରି ଚାଲିବ। ଚଳିତ ବର୍ଷ ୪୨ ବର୍ଷରେ ପଦାର୍ପଣ କରୁଥିବା ଏହି ପୂଜା ଏଥର ମହାସମାରୋହରେ ଆୟୋଜିତ ହେଉଛି। ୨୪ ତାରିଖରୁ ଆରମ୍ଭ ହେଉଥିବା ପୂଜା ନଭେମ୍ବର ୩ ତାରିଖରେ ଶେଷ ହେବ। ଏଥର ଏକ ସୁଦୃଶ୍ୟ ରାଜପ୍ରାସାଦର ତୋରଣ କରାଯାଉଛି। ପୂଜା ବିଧି ଅନୁଯାୟୀ ପ୍ରଥମ ଦିନ ରାତିରେ କଳସ ଅଧିବାସ, ମା’ଙ୍କର ଉପଚାର ପୂଜା ଓ ଚଣ୍ଡୀପାଠ ହେବ। ପ୍ରଥମ ଦିନ ମହାକାଳୀ ବେଶ ଅନୁଷ୍ଠିତ ହେବ। ୨୫ ତାରିଖରେ ସୂର୍ଯ୍ୟୋପରାଗ ହେବାକୁ ଥିବାରୁ ମା’ଙ୍କ ପୂଜାର ସମସ୍ତ ନୀତିକାନ୍ତି ବନ୍ଦ ରହିବ। ୨୬ ତାରିଖରେ ତାରାବେଶ, ୨୭ରେ ଷୋଡ଼ଶୀ ବେଶ, ୨୮ରେ ଭୁବନେଶ୍ବରୀ ବେଶ, ୨୯ରେ ଭୈରବୀ ବେଶ, ୩୦ରେ ଛିନ୍ନମସ୍ତା ବେଶ, ୩୧ରେ ଧୂମାବତୀ ବେଶ, ନଭେମ୍ବର ୧ରେ ବଗଳା ବେଶ, ୨ରେ ମାତଙ୍ଗୀ ବେଶ ଓ ଶେଷରେ ନଭେମ୍ବର ୩ତାରିଖ ଦିନ ମା’ଙ୍କର କମଳା ବେଶ ଅନୁଷ୍ଠିତ ହେବ। ପୂଜା ଅବସରରେ ସତ୍ୟକାଳୀ ମେଳା ଅନୁଷ୍ଠିତ ହେବ। ଦର୍ଶକଙ୍କ ମନୋରଞ୍ଜନ ପାଇଁ ମୀନାବଜାର ଓ ଦୋଳି ଆଦି ପଡ଼ିବ। ପୂଜାର ଶେଷ ୩ଦିନ ଭଜନ ସମାରୋହ ଅନୁଷ୍ଠିତ ହେବ।