ଆସନ୍ତୁ ଜାଣିବା ଆଇନା ବା ଦର୍ପଣ ଲଗାଇବାର ସଠିକ ଦିଗ ସମ୍ପର୍କରେ

ଦର୍ପଣ ଆମକୁ ଆମର ବ୍ୟକ୍ତିତ୍ୱର ଝଲକ ଦେଖାଇଥାଏ । ଏହା ଆମର ଦୈନନ୍ଦିନ ଜୀବନରେ କାମରେ ଲାଗୁଥିବା ଏକ ମହତ୍ତ୍ୱପୂର୍ଣ୍ଣ ବସ୍ତୁ ଅଟେ । ବାସ୍ତୁଶାସ୍ତ୍ର ଅନୁସାରେ ଦର୍ପଣ ଘରେ ସକାରାତ୍ମକ ଉର୍ଜାକୁ ବୃଦ୍ଧି କରିବାରେ ମହତ୍ତ୍ୱପୂର୍ଣ୍ଣ ଭୂମିକା ବହନ କରିଥାଏ । ଦର୍ପଣର ଏପରି କିଛି ଲାଭ ମଧ୍ୟ ରହିଛି ଯାହା ଦ୍ୱାରା ଆପଣ ନିଜ ଘରେ ଧନ, ପ୍ରସନ୍ନତା ତଥା ଖୁସିକୁ କିଛି ଗୁଣ ଅଧିକ ବୃଦ୍ଧି କରିପାରିବେ । ଦର୍ପଣ ସାହାଯ୍ୟରେ ଆପଣ ଘରେ ବ୍ୟାପିଥିବା ନକରାତ୍ମକ ଉର୍ଜାକୁ ଦୂର କରିପାରିବେ । ଗୃହର କେଉଁ ଦିଗରେ ଦର୍ପଣ ରଖିବା, କେଉଁ ଆକୃତିର ଦର୍ପଣ ଲାଗିଛି ଏହିସବୁ କଥାର ପ୍ରଭାବ ସେଠାକାର ଉର୍ଜା ଉପରେ ବିଶେଷ ପ୍ରଭାବ ପକାଇଥାଏ । ଏଥିପାଇଁ ବାସ୍ତୁ ଶାସ୍ତ୍ରରେ ଏହାର ଠିକ ଭୁଲ୍ ବ୍ୟବହାର ଉପରେ ଗୁରୁତ୍ଵ ଦିଆଯାଇଛି । ଭୁଲ୍ ଦିଗ କିମ୍ବା ଭୁଲ୍ ଆକୃତିର ଦର୍ପଣ ଆପଣଙ୍କ ପାଇଁ ଅସୁବିଧାର କାରଣ ହୋଇପାରେ ।

ଆର୍ଥିକ ଲାଭ ପାଇଁ :

ଦର୍ପଣକୁ କେବେ ମଧ୍ୟ ଘରର ପଶ୍ଚିମ ଅଥବା ଦକ୍ଷିଣ ଦିଗର କାନ୍ଥରେ ଲଗାନ୍ତୁ ନାହିଁ । କାରଣ ଏହି ଦିଗରେ ଲାଗିଥିବା ଦର୍ପଣ ପୂର୍ବ ଓ ଉତ୍ତର ଦିଗରୁ ଆସୁଥିବା ସକାରାତ୍ମକ ଉର୍ଜାକୁ ପ୍ରତିଫଳିତ କରିଦିଏ । ବାସ୍ତୁ ଶାସ୍ତ୍ର ଅନୁସାରେ ଦର୍ପଣକୁ ସର୍ବଦା ପୂର୍ବ ଅଥବା ଉତ୍ତର ଦିଗର କାନ୍ଥରେ ଏପରି ଭାବରେ ଲଗାଇବା ଉଚିତ ଯେପରି ଏହାକୁ ଦେଖୁଥିବା ବ୍ୟକ୍ତିର ମୁଖ ପୂର୍ବ କିମ୍ବା ଉତ୍ତରରେ ରହିବ । ଉତ୍ତର ଦିଗରେ ଲାଗିଥିବା ଦର୍ପଣ ଆପଣଙ୍କ ଆର୍ଥିକ ଉନ୍ନତିକୁ ବୃଦ୍ଧି କରିଥାଏ । ସେପଟେ ଉତ୍ତର, ଐଶାନ୍ୟ କୋଣ ଓ ପୂର୍ବ ଦିଗରେ ଦର୍ପଣ ଲଗାଇଲେ ଘରର ସଦସ୍ୟଙ୍କ ଉନ୍ନତି ସହ ସମାଜରେ ଆପଣଙ୍କ ମାନସମ୍ମାନ ଓ ଯଶ ବୃଦ୍ଧି ହେବ ।

ଶୋଇବା ଘରେ ଆଇନା ଲଗାଇବା ଅଶୁଭ ଅଟେ :

ଦର୍ପଣ ସମ୍ବନ୍ଧୀୟ ସବୁଠାରୁ ମହତ୍ତ୍ୱପୂର୍ଣ୍ଣ ବିଷୟ ହେଉଛି, ଏହାକୁ ଶୟନ କକ୍ଷରେ ଲଗାଇବା ଉଚିତ ନୁହେଁ । ଏପରି କରିବା ଦ୍ୱାରା ଦାମ୍ପତ୍ୟ ଜୀବନରେ ବିଶ୍ୱାସର ଅଭାବ ଦେଖାଦିଏ । ଏହା ସହିତ ସ୍ୱାମୀ ସ୍ତ୍ରୀ ମଧ୍ୟରେ ଆପୋଷ ମତଭେଦ ବଢ଼ିଥାଏ ଏବଂ ସ୍ୱାମୀ ସ୍ତ୍ରୀଙ୍କୁ କିଛି ସ୍ୱାସ୍ଥ୍ୟ ସମ୍ବନ୍ଧୀୟ ସମସ୍ୟାର ସମ୍ମୁଖୀନ ହେବାକୁ ପଡ଼ିଥାଏ । ସ୍ୱାମୀ ସ୍ତ୍ରୀ ଉଭୟ ସର୍ବଦା ଆଳସ୍ୟ ଅନୁଭବ କରିଥାନ୍ତି, କାମ କରିବାକୁ ଆଗ୍ରହ ଆସେ ନାହିଁ । ଯଦି ଡ୍ରେସିଂ ଟେବୁଲ ରଖିବା ଜରୁରୀ ଅଟେ, ତେବେ ଏପରି ଭାବରେ ରଖନ୍ତୁ ଯେପରି ଶୋଇଥିବା ବ୍ୟକ୍ତିଙ୍କ ପ୍ରତିବିମ୍ବ ଦର୍ପଣରେ ଦେଖା ଯାଉନଥିବ ଅଥବା ଶୋଇବା ପୂର୍ବରୁ ଏହାକୁ ଘୋଡେ଼ଇ ଦିଅନ୍ତୁ । ଏହା ମଧ୍ୟ ଧ୍ୟାନ ରଖନ୍ତୁ ଯେ, ଯେଉଁ ସ୍ଥାନରେ ଦର୍ପଣ ଲାଗିଛି ସେଠାରେ ନକରାତ୍ମକ ପ୍ରଭାବକୁ ବୃଦ୍ଧି କରୁଥିବା ବସ୍ତୁର ପ୍ରତିବିମ୍ବ ଦେଖାନଯିବ ।

ପଢନ୍ତୁ: ରୋଷେଇ ଘରର ୧୦ଟି ମହତ୍ୱପୂର୍ଣ୍ଣ ବାସ୍ତୁ ନିୟମ