ଅଗ୍ନିବୀର ନିଯୁକ୍ତି ପ୍ରକ୍ରିୟାରେ ପରିବର୍ତ୍ତନ, ଅନଲାଇନ ପ୍ରବେଶିକା ପରୀକ୍ଷା ଦେବେ ଛାତ୍ରଛାତ୍ରୀ

ଭାରତୀୟ ସେନା ପ୍ରଥମ ପଦକ୍ଷେପ ଭାବରେ କମ୍ପ୍ୟୁଟର ଆଧାରିତ ଅନଲାଇନ ସାଧାରଣ ପ୍ରବେଶିକା ପରୀକ୍ଷା ଆରମ୍ଭ କରିବା ସହିତ ଅଗ୍ନିବୀର, ଜୁନିଅର କମିଶନଡ ଅଫିସର ଏବଂ ଅନ୍ୟାନ୍ୟ ବର୍ଗରେ ପ୍ରବେଶ ନିମନ୍ତେ ନିଯୁକ୍ତି ପ୍ରକ୍ରିୟାରେ ପରିବର୍ତ୍ତନ ଆଣିଛି । ଯୋଗ୍ୟ ପଞ୍ଜୀକୃତ ପ୍ରାର୍ଥୀ ମାନଙ୍କ ପାଇଁ ଅନଲାଇନ ସିଇଇ ଆଜି ୧୭୬ଟି ଅଖିଳ ଭାରତ ସ୍ତରୀୟ ସ୍ଥାନରେ ୩୭୫ ପରୀକ୍ଷା କେନ୍ଦ୍ରରେ ଆରମ୍ଭ ହୋଇ ସାରିଛି । ୨୬ ଏପ୍ରିଲ ୨୦୨୩ ପର୍ଯ୍ୟନ୍ତ ଏହି ପରୀକ୍ଷା ଚାଲିବ ।ତିନିଟି ପର୍ଯ୍ୟାୟରେ ନୂତନ ନିଯୁକ୍ତି ପ୍ରକ୍ରିୟା ସମ୍ପନ୍ନ କରାଯିବ । ପ୍ରଥମ ପର୍ଯ୍ୟାୟରେ, www.joinindianarmy.nic.inରେ ଅନଲାଇନରେ ପଞ୍ଜୀକୃତ ହୋଇଥିବା ଏବଂ ଆବେଦନ କରିଥିବା ସମସ୍ତ ପ୍ରାର୍ଥୀ ଅନଲାଇନ ସାଧାରଣ ପ୍ରବେଶିକା ପରୀକ୍ଷା ଦେବେ । ଦ୍ୱିତୀୟ ପର୍ଯ୍ୟାୟରେ, ସଫଳ ତାଲିକାଭୁକ୍ତ ପ୍ରାର୍ଥୀମାନଙ୍କୁ ଜୁନ ୨୦୨୩ରୁ ସମ୍ପୃକ୍ତ ସେନା ନିଯୁକ୍ତି କାର୍ଯ୍ୟାଳୟ ଦ୍ୱାରା ସ୍ଥିର ହୋଇଥିବା ସ୍ଥାନରେ ନିଯୁକ୍ତି ରାଲି ପାଇଁ ଡକରା ଦିଆଯିବ । ଯେଉଁଠାରେ ସେମାନଙ୍କର ଶାରୀରିକ ସୁସ୍ଥତା ପରୀକ୍ଷା ଏବଂ ଶାରୀରିକ ମାପ ପରୀକ୍ଷା କରାଯିବ । ଶେଷରେ, ତୃତୀୟ ପର୍ଯ୍ୟାୟରେ ମନୋନୀତ ପ୍ରାର୍ଥୀମାନେ ମେଡିକାଲ ପରୀକ୍ଷା ଦେବେ । ଏହାପରେ ସଫଳ ପ୍ରାର୍ଥୀଙ୍କ ଅନ୍ତିମ ଯୋଗ୍ୟତା ତାଲିକା ଘୋଷଣା କରାଯିବ । ସଂଶୋଧିତ ନିଯୁକ୍ତି ବ୍ୟବସ୍ଥା ନିଯୁକ୍ତି ପ୍ରକ୍ରିୟାକୁ ଅଧିକ ଶୃଙ୍ଖଳିତ, ସ୍ୱଚ୍ଛ କରିବ ଏବଂ ଦେଶରେ ଉପଲବ୍ଧ ଅତ୍ୟାଧୁନିକ ଆଇଟି ଭିତ୍ତିଭୂମିର ସର୍ବାଧିକ ବ୍ୟବହାର କରାଯିବା ପାଇଁ ଡିଜାଇନ କରାଯାଇଛି ।