News

ପୌରପାଳିକା ଉପ ନିର୍ବାଚନ : ମାତ୍ର ୫ଦିନ ରହିଲା

ପାରାଦୀପ ପୌରପାଳିକା ଉପ ନିର୍ବାଚନକୁ ଆଉ ମାତ୍ର ୫ଦିନ ରହିଲା। ହାତରେ ବହୁତ କମ୍‍ ସମୟ ଥିବାରୁ ତିନି ପ୍ରମୁଖ ରାଜନୈତିକ ଦଳ ପ୍ରଚାରକୁ ଜୋରଦାର କରିଛନ୍ତି। ପ୍ରବଳ ଥଣ୍ଡା ସତ୍ତେ୍ଵ ନେତାମାନେ ଓ୍ଵାର୍ଡରେ ବୁଲି ବୁଲି ପ୍ରଚାର କରୁଛନ୍ତି।

ପ୍ରବଳ ଥଣ୍ଡା ସତ୍ତେ୍ଵ ବିଳମ୍ବିତ ରାତିି ପର୍ଯ୍ୟନ୍ତ ନେତାମାନେ ବାଉରିଆପାଳନ୍ଦା ବସ୍ତି  ରେ ପ୍ରଚାର କରୁଥିବା ଦେଖାଯାଉଛି। ବସ୍ତି ବାସିନ୍ଦାଙ୍କୁ ଆକୃଷ୍ଟ କରିବା ପାଇଁ ସବୁ ଦଳର ନେତା ପ୍ରୟାସ ଜାରି ରଖିଥିବା ବେଳେ ଶାସକ ଦଳ ନିଜର ସମ୍ମାନ ବଞ୍ଚାଇବା ପାଇଁ ପ୍ରାଣମୂର୍ଚ୍ଛା ଉଦ୍ୟମ ଆରମ୍ଭ କରିଦେଇଛି।

ବିଧାୟକ ଡାକ୍ତର ଦାମୋଦର ରାଉତ ଏବଂ ତାଙ୍କ ପୁଅ ତଥା ଯୁବ ନେତା ସମ୍ବିତ ରାଉତରାୟ ଓ ସାଂସଦ କୁଳମଣି ସାମଲଙ୍କ ସମେତ ଅନ୍ୟ ବୟୋଜ୍ୟେଷ୍ଠ ନେତାମାନେ ବାଉରିଆପାଳନ୍ଦାରେ ପହଞ୍ଚି ପ୍ରଚାରରେ ସାମିଲ ହୋଇଛନ୍ତି।

ସାଂସଦ କୁଳମଣି ସାମଲ କହିଛନ୍ତି ଯେ, ବସ୍ତିରେ ଥିବା ବିଭିନ୍ନ ସମସ୍ୟା ଦୂର କରାଯାଇଛି। ବିଶେଷ କରି ପୂର୍ବରୁ ଥିବା ବିଜୁଳି ଓ ପାନୀୟ ଜଳ ସମସ୍ୟାକୁ ଦୂର କରାଯାଇଛି। ଆଉ ଯାହା ବି କିଛି ସମସ୍ୟା ରହିଛି ଖୁବ୍‌ ଶୀଘ୍ର ସେଗୁଡ଼ିକର ସମାଧାନ କରାଯିବ। ଏଣୁ ବିଜେଡି ପ୍ରାର୍ଥୀ ଏଠାରେ ନିଶ୍ଚିତ ବିଜୟୀ ହେବେ। ସବୁଠାରୁ ଗୁରୁତ୍ଵପୂର୍ଣ୍ଣ କଥା ହେଲା, ସମସ୍ତଙ୍କ ନଜରର କେନ୍ଦ୍ରବିନ୍ଦୁ ଥିବା ବିଧାୟକ ଡାକ୍ତର ରାଉତ ଆଜି ପାରାଦୀପରେ ପହଞ୍ଚି ଦଳୀୟ ନେତାଙ୍କ ସହ ଗୁପ୍ତ ମନ୍ତ୍ରଣା କରିଥିବା ବେଳେ ବସ୍ତିବାସିନ୍ଦାଙ୍କୁ ରାଜ୍ୟ ସରକାରଙ୍କ ବିଭିନ୍ନ ଉନ୍ନୟନ ମୂଳକ ଯୋଜନା ସମ୍ପର୍କରେ ବୁଝାଇଛନ୍ତି।

ଓ୍ଵାର୍ଡ ନମ୍ବର ୬ ବର୍ତ୍ତମାନ ସବୁ ଦଳ ପାଇଁ ମୁଣ୍ଡବିନ୍ଧାର କାରଣ ପାଲଟିଛି। କୌଣସି ଦଳ ନିଜର ବିଜୟକୁ ସୁନିଶ୍ଚିତ କରିପାରୁ ନାହାନ୍ତି। ତଥାପି ନିଜ ନିଜ ଦଳ ସମର୍ଥନରେ ନିର୍ବାଚନ ଲଢ଼ୁଥିବା ପ୍ରାର୍ଥୀମାନଙ୍କୁ ବିଜୟୀ କରାଇବାକୁ ଚେଷ୍ଟା ଚଳାଇଛନ୍ତି। ବିଜେପିର ମଙ୍ଗ ସମ୍ଭାଳିଛନ୍ତି ସ୍ଥାନୀୟ ନେତା ନିର୍ମଳ ସ୍ୱାଇଁ ଓ ତାଙ୍କ ପୁତ୍ର ଜିଲ୍ଲା ଯୁବ ମୋର୍ଚ୍ଚା ସଭାପତି ସମ୍ପଦ ସ୍ୱାଇଁ। ଦଳୀୟ ପ୍ରାର୍ଥୀଙ୍କୁ ବିଜୟୀ କରାଇବା ପାଇଁ କଠିନ ପରିଶ୍ରମ କରୁଛନ୍ତି।

କଂଗ୍ରେସ ନେତା ବାପି ସର୍ଖେଲ ଓ ଓ୍ଵାର୍ଡ ଦାୟିତ୍ଵରେ ଥିବା ପୂର୍ବତନ ପାରିଷଦ କେଦାର ଜେନା ମଧ୍ୟ ପ୍ରଚାରକୁ ଜୋରଦାର କରିଛନ୍ତି। ରାଜ୍ୟ ସରକାରଙ୍କ ବିଫଳତାକୁ ପ୍ରସଙ୍ଗ କରିଛି କଂଗ୍ରେସ। ଦଳ ପାଇଁ ଏହା ଏକ ଭଲ ସୁଯୋଗ ରହିଛି ବୋଲି ନେତାମାନେ ଆଶା ରଖିଛନ୍ତି। ଏଥିପାଇଁ ପ୍ରବଳ ଥଣ୍ଡାକୁ ଖାତିର ନ କରି ବାପି ଓ ତାଙ୍କ ସମର୍ଥକମାନେ ପ୍ରଚାର ଚଳାଇଛନ୍ତି।

ପଢନ୍ତୁ ;

ମାର୍ଚ୍ଚ ୫ରୁ ଆରମ୍ଭ ସିବିଏସଇ ପରୀକ୍ଷା : ସିବିଏସଇ ପକ୍ଷରୁ ବ୍ୟାପକ ବ୍ୟବସ୍ଥା

Related posts

ପୁଲିସ-ବାଲି ମାଫିଆଙ୍କ ଅସାଧୁ ମେଣ୍ଟ : ସାମ୍ବାଦିକଙ୍କୁ ଡମ୍ପର ମଡ଼ାଇ ହତ୍ୟା

ENO Beuro

ଆଜି ଠାରୁ ସୁପ୍ରିମକୋର୍ଟରେ ହେବ ଅଯୋଧ୍ୟା ବିବାଦୀୟ ଢ଼ାଞ୍ଚା ପ୍ରସଙ୍ଗରେ ନିୟମିତ ଶୁଣାଣି

ENO Beuro

ବଙ୍ଗୋପସାଗରରେ ଘୂର୍ଣ୍ଣିବଳୟ:୫ରୁ ପ୍ରବଳ ବର୍ଷା

ENO Beuro

Leave a Comment