ପତ୍ନୀ ନିର୍ଯାତନା ମାମଲାରେ ବଢୁଛି ହ୍ୟୁମାନଙ୍କ ଅଡୁଆ, ଆରମ୍ଭ ହେଲା ଆରୋପ ଦୋଷାରୋପ

ଚାରିରୁ ପାଞ୍ଚ ମାସ ଧରି କଣ୍ଠଶିଳ୍ପୀ ହ୍ୟୁମାନ ସାଗରଙ୍କ ଦାମ୍ପତ୍ୟ କଳିର ଯେଉଁ ନିଆଁ ଘରର ଚାରିକାନ୍ଥ ଭିତରେ କୁହୁଳୁଥିଲା, ଆଜି ତାହା ବ୍ୟାପିଯାଇଛି ଚାରିଆଡ଼େ । ନିର୍ଯାତନା ସହ ଘରୋଇ ହିଂସା ଅଭିଯୋଗ ମାମଲାରେ ବଢ଼ିଛି ପ୍ଲେବ୍ୟାକ ସିଙ୍ଗର୍ ହ୍ୟୁମାନଙ୍କ ଅଡୁଆ । କଟକ ମହିଳା ଥାନାରେ ପତ୍ନୀ ଶ୍ରୀୟା ମିଶ୍ରଙ୍କ ଅଭିଯୋଗର ଦିନକ ମଧ୍ୟରେ ଥାନାରେ ହାଜର ହୋଇଛନ୍ତି ହ୍ୟୁମାନ । କେବଳ ହ୍ୟୁମାନ ନୁହଁନ୍ତି, ତାଙ୍କ ପତ୍ନୀ ବି ପହଞ୍ଚିଥିଲେ ଥାନାରେ।  

ସମନ ଅନୁଯାୟୀ, ଆଜି ଉଭୟେ ମହିଳା ଥାନାରେ ହାଜର ହେବା ସହ ନିଜ ନିଜର ପକ୍ଷ ରଖିଥିଲେ । ଆଉ ଗଣମାଧ୍ୟମ ଆଗରେ ପରସ୍ପର ବିରୋଧରେ ଗୋହି ଖୋଳିଥିଲେ । ସାଂଘାତିକ ଅଭିଯୋଗ ଆଣି ଶ୍ରୀୟାଙ୍କ ଓକିଲ କହିଛନ୍ତି,ହ୍ୟୁମା ଶ୍ରୀୟାଙ୍କ ଧର୍ମ ପରିବର୍ତ୍ତନ କରିବାକୁ ଚେଷ୍ଟା କରୁଥିଲେ । ଏପରିକି ବିବାହ ପରେ ହ୍ୟୁମାନ ଯୌତୁକ ମାଗିବା ସହ ଶ୍ରୀୟାଙ୍କୁ ହତ୍ୟା ଉଦ୍ୟମ କରିଥିଲେ ।ଥାନାରୁ ବାହାରିବା ପରେ ହ୍ୟୁମାନ ସମସ୍ତ ଅଭିଯୋଗକୁ ଖଣ୍ଡନ କରିବା ସହ କହିଛନ୍ତି ଧର୍ମ ପରିବର୍ତ୍ତନ ପାଇଁ ଆଦୌ ଚାପ ପକାଇନି । ଲୋକଙ୍କ ଆଶୀର୍ବାଦରୁ ଭଲରେ ଅଛି, ଯୌତୁକ କାହିଁକି ମାଗିବି । 

ହ୍ୟୁମାନ ସାଗରଙ୍କ  ଅଭିଯୋଗ ଆଣିଛନ୍ତି ଶ୍ୱଶୁର । ସେ କହିଛନ୍ତି, ୪ ମାସ ହେବ ହ୍ୟୁମାନ ଓ ଶ୍ରୀୟା ଅଲଗା ରହୁଛନ୍ତି । ମଦ ପିଇ ଝିଅକୁ ମାରଧର କରୁଥିଲେ ହ୍ୟୁମାନ । ମାଡ଼ ମାରିବା ସହ ବାରମ୍ବାର ଟଙ୍କା ମାଗୁଥିଲେ । ଅତ୍ୟାଚାର ସହି ନପାରି ଝିଅ ଘରକୁ ଚାଲିଆସିଲା । ଆପୋସ ସମାଧାନ କରିବାକୁ ଡର ଲାଗୁଛି । ହ୍ୟୁମାନଙ୍କ ମାଆ ମଧ୍ୟ ଝିଅକୁ ଦୁର୍ବ୍ୟବହାର କରୁଥିବା ଅଭିଯୋଗ କରିଛନ୍ତି ।ଆହୁରି କହିଛନ୍ତି, ହ୍ୟୁମାନଙ୍କର ଅନ୍ୟ ଝିଅଙ୍କ ସହ ସମ୍ପର୍କ ଥିବା ଶୁଣିବାକୁ ମିଳୁଛି । ଏବେ ପ୍ରଶ୍ନ ଉଠୁଛି ତାଙ୍କ ସହ ସମ୍ପର୍କରେ ଥିବା ଯୁବତୀ କିଏ ?