ବୟସ୍କ ମହିଳାଙ୍କ ପାଇଁ ମାଗଣା ବସ ଯାତ୍ରା ଘୋଷଣା କଲେ ଯୋଗୀ ସରକାର

ଦିଲ୍ଲୀରେ ବିଭିନ୍ନ ମାଗଣା ଯୋଜନା ପ୍ରଣୟନ କରି ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ କ୍ଷମତା ବଜାୟ ରଖିବାରେ ସଫଳ ହୋଇଛନ୍ତି । ଏବେ ଦିଲ୍ଲୀର ବିଭିନ୍ନ ଯୋଜନାକୁ ନିଜ ନିଜ ରାଜ୍ୟରେ ପ୍ରଣୟନ କରିବାକୁ ଅଣ୍ଟା ଭିଡିଛନ୍ତି ମୁଖ୍ୟମନ୍ତ୍ରୀମାନେ । ସେ ମାଗଣା ବିଜୁଳି ଯୋଜନା ହେଉ କି ମାଗଣା ପାଣି ଯୋଜନା । ଏତିକି ନୁହେଁ ମାଗଣା ଶିକ୍ଷା, ମାଗଣା ସ୍ୱାସ୍ଥ୍ୟ, ମାଗଣା ବସ୍ ଯାତ୍ରା ଭଳି ଯୋଜନାକୁ ଏବେ ବିଭିନ୍ନ ରାଜ୍ୟ ସରକାର ପ୍ରଣୟନ କରିବାକୁ ଯାଉଛନ୍ତି । ଏହି କ୍ରମରେ ଦେଶର ସବୁଠାରୁ ବଡ ରାଜ୍ୟ କୁହାଯାଉଥିବା ଉତ୍ତର ପ୍ରଦେଶର ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟ ନାଥ ରାଜ୍ୟର ବୟସ୍କ ମହିଳାମାନଙ୍କ ପାଇଁ ଏକ ଗୁରୁତ୍ୱପୂର୍ଣ୍ଣ ଘୋଷଣା କରିଛନ୍ତି ।

ଏହି ଘୋଷଣା ମୁତାବକ ରାଜ୍ୟର ଏବେ ୬୦ ବର୍ଷରୁ ଅଧିକ ବୟସର ମହିଳାମାନଙ୍କୁ ବସରେ ମାଗଣା ଯାତ୍ରାର ସୁବିଧା ମିଳିବ । ବିଧାନସଭା ନିର୍ବାଚନ ପୂର୍ବରୁ ଯୋଗୀ ସରକାର ଏନେଇ ରାଜ୍ୟବାସୀଙ୍କୁ ପ୍ରତିଶ୍ରୁତି ଦେଇଥିଲେ  । ସରକାରଙ୍କ ସୂଚନା ମୁତାବକ ରାଜ୍ୟ ସରକାର ଏହି ଯୋଜନାକୁ କାର୍ଯ୍ୟକାରୀ କରିବା ପରେ ବାର୍ଷିକ ୨୬୪ କୋଟି ଟଙ୍କା ଖର୍ଚ୍ଚ ହେବ । ଏହା ପୂର୍ବରୁ ଦେଶର ଅନ୍ୟ ଦୁଇଟି ରାଜ୍ୟରେ ବି ଏହି ଯୋଜନା ଲାଗୁ ହୋଇ ସାରିଛି । ପ୍ରଥମେ ଦିଲ୍ଲୀ ଓ ପରେ ରାଜସ୍ଥାନର କଂଗ୍ରେସ ସରକାର ରାଜ୍ୟର ମହିଳାମାନଙ୍କୁ ମାଗଣା ବସ ସେବା ଯୋଗାଇ ଦେଉଛନ୍ତି ।