ଲୋକପ୍ରିୟ ଅଭିନେତା ଅରୁଣ ବାଲିଙ୍କର ପରଲୋକ

ମନୋରଂଜନ ଦୁନିଆଁରୁ ଆଉ ଏକ ଦୁଃଖଦ ଖବର । ବଲିଉଡର ଜଣାଶୁଣା ତଥା ଲୋକପ୍ରିୟ ଅଭିନେତା ଅରୁଣ ବାଲିଙ୍କର ପରଲୋକ ହୋଇଯାଇଛି । ଅନେକ ସିରିଏଲ ସହ ଫିଲ୍ମରେ କାମ କରି ନିଜର ଭିନ୍ନ ଭିନ୍ନ ଅଭିନୟର ଛାପ ଛାଡିଥିବା ଅରୁଣ ବାଲିଙ୍କର ୭୯ ବର୍ଷରେ ପରଲୋକ ହୋଇଛି ।  ଅସୁସ୍ଥତା କାରଣରୁ ତାଙ୍କୁ କିଛି ମାସ ହେବ ହସ୍ପିଟାଲରେ ଚିକିତ୍ସାରେ ରଖାଯାଇଥିଲା । ଆଜି ଭୋର ପାଖାପାଖି ସାଢେ ୪ଟା ସମୟରେ ମୁମ୍ବାଇରେ ସେ ଶେଷ ନିଃଶ୍ୱାସ ତ୍ୟାଗ କରିଛନ୍ତି । ତାଙ୍କ ନିଧନରେ ବଲିଉଡ ଇଣ୍ଡଷ୍ଟ୍ରିରେ ଶୋକର ଛାୟା ଖେଳିଯାଇଛି ।

‘ଥ୍ରୀ ଇଡିଅଟ୍ସ’, ‘କେଦାରନାଥ‘ ମୁଭିରେ ତାଙ୍କ ଅଭିନୟ ସବୁଠୁ ପ୍ରଶଂସନୀୟ ଥିଲା । ଅନେକ ଲୋକପ୍ରିୟ ଧାରାବାହିକରେ କାମ କରିବା ସହ ଅନେକ ଫିଲ୍ମରେ ମଧ୍ୟ କାମ କରିଛନ୍ତି ଅରୁଣ ବାଲି । ୯୦ ଦଶକରେ ନିଜ କାରିଅର ଆରମ୍ଭ କରିଥିବା ଅରୁଣ ବାଲି ‘ରାଜୁ ବନଗୟା ଜେଣ୍ଟଲମ୍ୟାନ୍’, ଖଲନାୟକ’, ‘ଜବ୍ ୱିି ମେଟ୍’, ‘ଫୁଲ ଔର ଅଙ୍ଗାରେ’, ‘କେଦାରନାଥ‘,‘ଥ୍ରୀ ଇଡିଅଟ୍ସ’ ପରି ଅନେକ ଫିଲ୍ମରେ କାମ କରିଛନ୍ତି । ସବୁଥିରେ ଭିନ୍ନ ଭିନ୍ନ ଚରିତ୍ରରେ ଅଭିନୟ କରି କଳାର ଛାପ ଛାଡିଯାଇଛନ୍ତି । ଏହା ବ୍ୟତୀତ ‘ ବାବୁଲ କି ଦୁଆଏଁ ଲେତି ଯା’, ‘କୁମକୁମ’ ପରି ସିରିଏଲରେ ମଧ୍ୟ ସେ କାମ କରିଛନ୍ତି । ସୂଚନା ମୁତାବକ, ଅରୁଣବାଲି ଏକ ବିରଳ ରୋଗରେ ପୀଡିତ ଥିଲେ । ଏହା ହେଉଛି ମ୍ୟାସ୍ଥେନିଆ । ଏହା ଏକ ଅଟୋଇମ୍ୟୁନୋ ରୋଗ ଅଟେ, ଏଥିରେ ନର୍ଭସ୍ ଓ ମସଲ୍ସ ମଧ୍ୟରେ ସମ୍ପର୍କ ବିଚ୍ଛିନ୍ନ ହୁଏ । ରକ୍ତ ସଞ୍ଚଳନରେ ମଧ୍ୟ ସମସ୍ୟା ହୁଏ ।