ଇସ୍ତଫା ଦେଲେ ଭାରତର ହ୍ୱାଟ୍ସ ଆପ୍‌ ମୁଖ୍ୟ ଏବଂ ମେଟା ପବ୍ଲିକ୍‌ ମୁଖ୍ୟ

ଲୋକପ୍ରିୟ ସୋସିଆଲ ମିଡିଆ କମ୍ପାନୀମାନଙ୍କରେ ଛଟେଇ ଚାଲିଥିବା ବେଳେ ଭାରତର ଦୁଇ ବଡ଼ ଅଧିକାରୀ ଚାକିରିରୁ ଇସ୍ତଫା ଦେଇଛନ୍ତି। ମେଟାର ଭାରତୀୟ ମୁଖ୍ୟ ଅଜିତ ମୋହନ ଦୁଇ ସପ୍ତାହ ତଳେ ଇସ୍ତଫା ଦେଇଥିବା ବେଳେ ଆଜି କମ୍ପାନୀର ପବ୍ଲିକ ପଲିସି ମୁଖ୍ୟ ରାଜୀବ ଅଗ୍ରୱାଲ ସମାନ ପଦକ୍ଷେପ ନେଇଛନ୍ତି। ସେ ଭାରତରେ ମେଟାର ପବ୍ଲିକ ପଲିସି ମୁଖ୍ୟ ଭାବେ କାମ କରୁଥିଲେ। କିନ୍ତୁ ସେ ଆଜି ନିଜ ପଦରୁ ଇସ୍ତଫା ଦେଇଛନ୍ତି। ଅନ୍ୟପଟେ ହ୍ୱାଟସଆପ୍‌ ମେସେଜିଂ ଆପ୍‌ର ଭାରତ ମୁଖ୍ୟ ଅଭିଜିତ ବୋଷ ମଧ୍ୟ ଆଜି ନିଜ ପଦରୁ ଇସ୍ତଫା ଦେଇଛନ୍ତି। ଏ ସମ୍ପର୍କରେ ମେଟା ପକ୍ଷରୁ ବିବୃତି ଜାରି କରାଯାଇ ସୂଚନା ଦିଆଯାଇଛି।

ହ୍ୱାଟସଆପ୍‌ର ବିଶ୍ୱ ମୁଖ୍ୟ ୱିଲ କ୍ୟାଥକାର୍ଟ ଦୀର୍ଘ ବର୍ଷ ଧରି ଭାରତୀୟ ମୁଖ୍ୟ ଭାବେ କାମ କରୁଥିବା ଅଭିଜିତ ବୋଷଙ୍କୁ ମଧ୍ୟ ଆଗାମୀ ଭବିଷ୍ୟତ ପାଇଁ ଶୁଭେଚ୍ଛା ଜଣାଇଛନ୍ତି। ତାଙ୍କ ଅବଦାନ ଓ ପରିଶ୍ରମ ଯୋଗୁ ହ୍ୱାଟଆପ୍ ଆଜି ଭଲ ବ୍ୟବସାୟ କରିବା ସହ ଲକ୍ଷାଧିକ ଲୋକଙ୍କୁ ଫାଇଦା ଦେଇଛି। ଆଗକୁ ଭାରତରେ ହ୍ୱାଟସଆପ୍‌ ଆହୁରି ଭଲ କାମ କରିବାକୁ ଲକ୍ଷ୍ୟ ରଖିଛି। ଭାରତର ଡିଜିଟାଲ ଟ୍ରନ୍ସଫରମେସନରେ ହ୍ୱାଟସଆପ୍‌ର ଯୋଗାଦାନ ରହିବ ବୋଲି ୱିଲ କହିଛନ୍ତି।