ଠକେଇ ମାମଲାରେ ଜରିନ ଖାନଙ୍କୁ ମିଳିଲା ଅନ୍ତରୀଣ ଜାମିନ

ପଶ୍ଚିମବଙ୍ଗର ରାଜଧାନୀ କୋଲକାତାର ଏକ କୋର୍ଟ ସୋମବାର ନରକେଲଡଙ୍ଗା ପୁଲିସ ଷ୍ଟେସନରେ ପଞ୍ଜୀକୃତ ହୋଇଥିବା ଏକ ଠକେଇ ମାମଲାରେ ବଲିଉଡ ଅଭିନେତ୍ରୀ ଜରିନ ଖାନଙ୍କୁ ଅନ୍ତରୀଣ ଜାମିନ ପ୍ରଦାନ କରିଛନ୍ତି। ବିନା ଅନୁମତିରେ ବିଦେଶ ଯାତ୍ରା ନକରିବାକୁ କୋର୍ଟ ଜରିନ ଖାନଙ୍କୁ ମଧ୍ୟ ନିର୍ଦ୍ଦେଶ ଦେଇଛନ୍ତି। ଏଥିସହ ତାଙ୍କୁ ପ୍ରତ୍ୟେକ ଶୁଣାଣିରେ କୋର୍ଟରେ ହାଜର ହେବାକୁ କୁହାଯାଇଛି। ଜରିନ ଖାନଙ୍କ ଓକିଲଙ୍କ ଯୁକ୍ତି ଶୁଣିବା ପରେ ସିଆଲଦା କୋର୍ଟ ୩୦୦୦୦ ଟଙ୍କା ବ୍ୟକ୍ତିଗତ ମୁଚାଲିକାରେ ଜରିନଙ୍କୁ ଡିସେମ୍ବର ୨୬ ପର୍ଯ୍ୟନ୍ତ ଅନ୍ତରୀଣ ଜାମିନ ପ୍ରଦାନ କରିଛନ୍ତି ଏବଂ କୋଲକାତା ପୁଲିସର ଅନୁମତି ବିନା ବିଦେଶ ନ ଯିବାକୁ କୁହାଯାଇଛି | ଶୁଣାଣି ପାଇଁ ମୁମ୍ବାଇରୁ ଆସିଥିବା ଜରିନ ଖାନଙ୍କୁ ମଧ୍ୟ ପ୍ରତ୍ୟେକ ଶୁଣାଣିରେ ହାଜର ହେବାକୁ କୋର୍ଟ ନିର୍ଦ୍ଦେଶ ଦେଇଛନ୍ତି।

ସୂଚନାନୁସାରେ, ଏକ ଠକେଇ ମାମଲାରେ କିଛି ଦିନ ତଳେ କୋଲକାତାର ଏକ କୋର୍ଟ ବଲିଉଡ ଅଭିନେତ୍ରୀ ଜରିନ ଖାନଙ୍କ ବିରୋଧରେ ଗିରଫ ପରୱାନା ଜାରି କରିଥିଲେ । ତାଙ୍କ ବିରୋଧରେ ୨୦୧୮ରେ ଏକ ମାମଲା ରୁଜୁ ହୋଇଥିଲା। ଅଭିଯୋଗ ହୋଇଥିଲା ଯେ ସେ ଏକ କାର୍ଯ୍ୟକ୍ରମରେ ଯୋଗ ଦେବାକୁ କହି ଅଗ୍ରିମ ନେଇଥିଲେ କିନ୍ତୁ ଯୋଗ ଦେଇନଥିଲେ | ଆୟୋଜକମାନେ ଅଭିନେତ୍ରୀଙ୍କ ବିରୋଧରେ ଗୁରୁତର ଅଭିଯୋଗ ଆଣିଥିଲେ । ଆୟୋଜକଙ୍କ କହିବାନୁସାରେ, ଜରିନ୍ ତାଙ୍କୁ ଅଣ୍ଡରୱାର୍ଲ୍ଡରେ ସମ୍ପର୍କ ଥିବା ନେଇ ମଧ୍ୟ ଧମକ ଦେଇଥିଲେ। ଉଲ୍ଲେଖ ଥାଉ କି ଯେ ଜରିନ୍ ଖାନ୍ ୨୦୧୦ ମସିହାରେ ‘ବୀର’ ଫିଲ୍ମ ମାଧ୍ୟମରେ ବଲିଉଡରେ ପାଦ ଥାପିଥିଲେ |